SURAT DARI MINAHASA

Ini tulisan yang dipublikasi di Suara Minahasa Magazine, edisi Juni 2004. Kita sandiri so lupa, ternyata waktu itu Minahasa banjir......

TOLONG….tolong, tolong akang pa torang, Minahasa somo tenggelam.
Sori, ini bukang iklan sinetron, mar itu tu jadi pa torang di Minahasa awal bulan Mei. Amper samua daerah di pinggir danau Tondano dapa banjer. Memang sampe surat ini kita tulis, nyanda ada korban jiwa. Mar tu korban lantaran harta ta anyor so nyanda dapa rekeng. Blum lei tu tanaman pertanian da rusak.
Memang tu banjer so amper salalu jadi di sebagian daerah di pinggir danau. Mar tu banjer kali ini sadiki luar biasa. Kalu dulu depe ketinggian paling basar tiga pulu senti, ini so lebe satu meter. Jadi ngoni bayangkan jo kalu tu jalan deng rumah so maso akang aer satu meter.
Ngoni stou mo ba tanya, kiapa kong kasiang dapa banjer? Sebenarnya ngoni nyanda usah tanya. Banjer terjadi lantaran (tantu saja) banya aer. He…he… kalu sadiki aer depe nama pece.
Banjer jadi lantaran tu danau Tondano (orang pande bilang) da meluap. Kiapa meluap, lantaran ujang turun. Memang sebelum banjer, tu ujang rupa dapa tako da ciri di Minahasa. Kalu nda sala inga, ampa hari tu ujang turun (pake ngoni pe istilah) non stop. Kong lei depe aer ba turun basar-basar, sama stou deng biji milu.
Jadi ngoni bayangkan jo kalu tu ujang turun ampa hari kong depe basar sama deng milu. Tu danau Tondano yang skarang memang so lebe sempit deng tofor, akhirnya nyanda mampu mo tampung tu kelebihan aer. Apalagi ada banya kuala kacili yang ba stor aer kase maso di danau. Lantaran tu danau so nyanda mampu mo tampung, akhirnya dia se ‘sumbang’ tu aer pa orang-orang di sekitar danau. Jadilah banjer.
Mar untung jo, tu pemerenta nyanda tutu mata. Nyanda lama setelah banjer, tu bupati Minahasa deng gubernur Sulut langsung turun kong cek langsung ke lokasi. Biar dorang gulung calana tinggi-tinggi kong pake spatu buts, mar dorang nyanda rasa kile mo turun di jalan punung aer ato lewat di jembatan bulu.
Memang, di brapa kampung,. Lantaran tu aer nyanda mo turun-turun, orang-orang disana barameji beking tangga ato jembatan dari bulu, da se sambung dari ruma-ruma. Jadi dorang kasiang kurang rupa orang Bajo (suku bajo tu suku dari luar Minahasa, kong dorang cuma ta biasa hidop di perahu. Itu menurut yang kita pernah baca).
Yang paling siksa kalu tu orang so ta biasa mandi. Biar lei aer banya, mar aer banjer tantu kotor. Depe warna coklat kong ba itam. Jadi nimbole mandi. Jadi tu orang biasa mandi (biasanya tu parampuang muda alias nona-nona) musti ba tahan diri. Jangankan mandi, dapa aer bersi jo so untung. Lantaran kadang mandi, so mulai muncul tu panyaki gatal-gatal.
Halo, masi ba baca? Ato so manganto stou kang? Sori kalu ta pe surat ini cuma da panjang deng berita banjer. Mar kita suka ngoni di perantauan sana tau kalu di Minahasa lei memang ja dapa banjer.
Oke bagini dulu stou kang? Nanti sambung bulan depan kalu tu banjer so turun. Eh sori, nyanda katu, cuma bakusedu.

No comments:

.
.
Powered by Blogger.