Surat dari Minahasa

Tulisan ini pernah dimuat di Suara Minahasa Magazine (SMM) edisi September 2003. SMM adalah majalah untuk Kawanua yang terbit di Amerika Serikat dan peredarannya hingga ke Eropa. Sayang majalah ini sudah tidak terbit lagi karena pengelolanya pindah negara bagian....


Halo…halo… Bandung, …eh salah kote… Halo samua. Bagimana kabar. So ada lampu ato masi gelap gulita. Soalnya kita pernah baca di surat kabar kalu di Amerika kata ada mati strom, kong tu keadaan so rupa di jaman tempo doeloe. He…he… Butul bagitu?
Torang di Minahasa sini nyanda abis pikir, tu negara adidaya sama deng Amrik masi ja mati strom. Kalu torang kasiang di sini, mati lampu itu biasa. Orang justru ba rasa heran kalu so satu minggu nyanda pernah mati strom….
Oh ya, ngoni so tau kalu tu Minahasa so ‘resmi’ ta pica? Tu Mendagri so resmikan tu kabupaten Minahasa Selatan deng Kota Tomohon. Jadi kalu ngoni orang Motoling ato Tombatu, ngoni skarang so nyanda orang Minahasa, mar so orang Minahasa Selatan alias Minsel.
Biar jo kang? Memang dia pe musim skarang ba sandiri kong bilang otonomi daerah. Padahal, bulum tantu kalu dorang mampu mo se makang tu rakyat ato nyanda. Belum lagi mo se makang tu pemerenta baru, mo beking gedung kantor, deng tu laeng-laeng. (Nintau lei kalu ada orang Minsel di Amerika mo suka beking majalah, kong dorang se nama ‘Suara Minahasa Selatan’… He…he….)
Lantaran so ta pica (dia pe bahasa bagus so dimekarkan), banya pegawai yang iko-iko ba pindah. Tu pegawai orang Minsel mar kerja di propinsi ato di Minahasa (induk), so suru pulang kong karja di Minsel deng Tomohon. Jadi skarang di Minahasa banya orang baku-baku bise, kong ja berdoa supaya dorang bole dapa tampa dudu bagus, supaya dorang ta kase pindah di tampa basah (dia pe maksud bukang supaya tu calana ato rok mo basah deng aer. Tu tampa basah itu tu tampa banya doi. Ngoni so tau kwa itu… jang pura-pura)
Tu bupati Minsel, mungkin ngoni so tau, dia pe nama Ramoy Markus Luntungan. Dia bukang orang Minsel, mar orang Minut (Minahasa Utara). Mar dia tu pemerenta pusat ada kase for mo jadi bupati, sampe pemilu taon datang. Memang tu Luntungan orang bilang figur yang (kalu ngoni pe bahasa bilang) the right man in the right place. Lantaran sebelum dilantik, banyak calon laeng tu orang-orang kase usul, mar dia pe latar belakang partai. Jadi tu PDIP se calon orang PDIP. Orang Golkar se calon orang Golkar.
Jadi tu Luntungan orang bilang pilihan yang paling pas, lantaran dia birokrat murni. Sebelum jadi bupati Minsel dia pe jabatan Sekda Minahasa. Dia lei kalu nyanda sala pernah jadi Sekda Bitung. Dia jadi pegawai dari bawah, dari camat.
Mar biar lei dia birokrat murni, banya orang tetap curiga, kong dorang bilang Luntungan lebe dekat deng Golkar. Soalnya pemerenta dulu kata orang Golkar (Padahal, tu bupati sebelum Vreeke, pak dolfie tanor, orang PDIP. Nintau lei bagimana dorang pe ba pikir)
Tu dapa sayang kasiang tu pejabat Sekda Minsel, Hendrik Waworuntu. Sebelum jadi sekda dia pe jabatan Asisten I pemkab Minahasa. Dia lei pejabat karir. Mar cuma berapa hari jadi Sekda langsung orang demon pa dia, lantaran tu Waworuntu kata terkait kasus KUT. (Memang bagitu stou orang Minahasa pe kalakuan kang? Bulum tare karja dong so curiga macam-macam, kong so komentar macam-macam).
Kalu tu Tomohon, sampe surat ini kita tulis, nyanda ada protes. Soalnya tu da jadi walikota orang Tomohon asli, Boy Tangkawarouw. Dia dulu wakil bupati Minahasa di jamannya Dolfie Tanor.
Selain kondisi politik yang so mulai panas, tu torang pe kondisi skarang masi biasa-biasa. Cuma skarang so musim ujang ulang. Amper tiap hari ujang. Riki tu pawai pembangunan memperingati tu kemerdekaan dapa ujang. Tu pawai di Tondano ujang, di Tomohon ujang. Mar biar lei ba ujang, tu penonton tetap nekat mo ba uni. Pe kentara skali kalu orang Tondano deng Tomohon pe mangkage pawai kang? (Jang bilang-bilang, soalnya deng kita lei da ba uni…..)
Eh, so ta panjang stou ta pesurat kang? Kalu bagitu, nanti jo sambung. Soalnya so mulai ba rinte-rinte. Jadi so rasa dingin. Ta mo beking kopi dulu kong ba uni tv. Jadi selamat berpisah, Pakatuan wo pakalawiren, I yayat u santi, sekali merdeka tetap merdeka……..

No comments:

.
.
Powered by Blogger.