Surat dari Minahasa

Tulisan ini dimuat di Suara Minahasa Magazine, majalah terbitan Amerika Serikat edisi Juli 2004, namun dibuat bulan Juni, saat Piala Eropa (di mana kote) tengah berlangsung...

Buat sudara di jao sana

Selamat baku dapa

Moga-moga ngoni samua nyanda kurang apa-apa, kong tu Tete Manis masi ja ambor-ambor akang berkat, kong Dia beking sehat-sehat selalu.

Kalu torang di sini, masi aman-aman, kong masi sehat-sehat. Memang akhir-akhir ini tu amper samua tuama di Minahasa so mulai ja dapa saki. Saki bringus deng panas. Depe penyebab, apa lagi kalu bukang tu Piala Eropa (Euro 2004).

Ngoni stou mo ta heran-heran kalu tau tu orang Minahasa pe suka skali ba uni bola kaki. Apalagi kalu ba bicara tu pertandingan macam Piala Eropa. Amper samua cirita salalu babunyi bola.

Di sini, di Minahasa, tu siaran langsung ja mulai jam 12 tenga malam deng jam tiga amper siang. Lantaran tu pertandingan amper tiap malam selama satu bulan, terpaksa katu banya tuama-tuama ja bagadang kong bauni dorang pe gaco ba dusu-dusu kong skop-skop tu bola bundar. Lantaran bagadang amper tiap amalam, jang ngoni heran kalu banya tu dapa saki.

Mar untung jo, sampe tu surat ini kita tulis, kita belum ada tanda-tanda mo dapa saki. Moga-moga tu torang pe Tete Manis tetap kase kekuatan (deng penghiburan) kalu ta pe gaco kalah. Kalu kita, ki tape gaco tu kesebelasan Inggris. Untung jo, waktu tu surat ini kita tulis, tu Inggris so lolos di babak perempat final. Nyanda sama deng tu Spanyol deng Italia yang so ciri kong terpaksa pulang kampung.

Kalu ngoni bagimana. Ja bau ni jo tu Piala Eropa? Dengar-dengar tu bola kaki nyanda top di Amerika kang? Yang top kata tu pertandingan baseball deng basket. Butul itu? Kong ngoni bagimana, so ta iko tu selera Amerika, ato masi suka bola. Kalu torang di sini, ya bole bilang pe maniak bola.

Selain dapa demam bola, torang pe keadaan masi biasa-biasa. Skarang so maso kampanye presiden, mar kiapa stou, depe suasana nyanda talalu dapa rasa kalu skarang kampanye. Pe beda skali deng tu kampanye legislatif tempo hari. Tempo, amper tiap hari ada konvoi ba kampanye. Skarang pe kadang kong nyanda dapa rasa.

Awal bulan Juni, tu Tondano da dapa tamu, peserta Pekan Nasional (se pende jadi Penas) Kontak Tani Nelayan Andalan (KTNA) se Indonesia . Tu da datang amper 15 ribu orang. Ngoni bayangkan jo tu Tondano dapa tamu pe banya bagitu. Lantaran pe banya, sebagian peserta ba tidor di Tomohon deng Sonder. Torang pe kampung da dapa tamu amper ampa ratus orang, dari propinsi Sumatera Utara.

Tu Penas ini memang sempat jadi pembicaraan, lantaran depe pembukaan da hadir torang pe Presiden, Megawati Soekarnoputri. Yang heboh, ibu Mega datang di stadion Maesa Tondano nyanda pake oto, mar pake helikopter. Supaya stou cepat kang?

Oke, bagini dulu ne kita pe surat . Kita somo tidor, lantaran sabantar mo ba gadang ba uni bola kaki. Nanti jo sambung bulan datang, kalu kita nyanda dapa saki. He…he…

No comments:

.
.
Powered by Blogger.